الخبزة التى تشبه المدفونة

السلام عليكم ورحمة الله تعالى وبركاته طريقة تحضير الخبزة التى تشبه المدفونة ناخد كيلو الطحين الفورص و نصف كيلو الحرش الفينو شوية خميرة الخبز شوية الملحة + الماء دافئ نعجنها وندلكها مزيان ولا تكون مرخوفة ثم نعمل منها كويرات قياس خبيزات متوسطين ونتركهم جانبا مغطين ثم ناخد 3 الفلفلات خضرين و 2 فلفلات حمرين ونعملهم شرائط طويلة و رقيقة ثم نقطعهم الى مربعات صغيرة بزاف و ناخد 4 بصلات كبار ونشلضهم رقاق ثم نعصرهم مزيان من الماء ونخلطهم مع الفلافل ثم نزيد شوية البزار شوية الكامون والتحميرة تكون كثيرة شوية و الملحة حسب الدوق و 2 معالق كبار زيت العود شوية البصلة غبرة اختيارية و 2 معالق كبار الشحمة محكوكة و نخلط الكل مزيان ثم نرجع للخبيزات ونرش الطحين الفورص ونكرص الخبيزة مزيان ثم ناخد شوية من الخليط ونسرحه فوقها بكثرة ثم نبدا نجمعها بالاصابع كالصرة ونحرص على ان لا تخرج الحشوة من الجوانب ثم نقلبها ويكون من تحتها الطحين لكى لا تلتصق ونضعها فى لاطة مدهونة بالزيت ومرشوشة بالطحين ونكرصها فيها بحال الخبز ونتركها حتى تخمر ثم ندهنها بالبيض ثم ندخلها الى الفران و بالصحة و الراحة. ملاحظة فهده الحشوة يمكن ان نعملها فى البطبوط بحيث نكرص البطبوط مزيان ثم نضع الحشوة و نجمعه كالصرة وندردر الطحين الفورص و نقلبه ونكرصه و نتركه حتى يخمر ثم نطيبه فى المقلة التقيلة ونرش كل مرة شوية الزيت.